Sakhtiyan karta hon dil par gair se gafil hun main

Sakhtiyan karta hon dil par gair se gafil hun main
Hay kya achi kahi zalim hun main jahil hun main

Hai meri zillat hi kuch meri sharafat ki dalil
Jis ki gaflat ko malak rote hain wo gafil hun main

Bazm-e-hasti apni araish pe tu nazan na ho
Tu to ik taswir hai mahfil ki aur mahfil hun main

Dhundhata phirta hun ai "Iqbal" apne ap ko
Ap hi goya musafir ap hi manzil hun main